لكل منا موهبة لا نعرفها ولكن يأتي الوقت المناسب ونكتشف هذه الموهبة ونبدأ فى السعي وبذل اقصي ما لدينا لأجل تحقيق الهدف والحصول على اعلى المراكز فى مجالنا وهذه الموهوبة مجالها الكتابة فالنبدأ بمعرفة معلومات عنها..
س١/ تكلم عن نفسك وكم المعاناة التي صادفتك ف هذا المجال!؟
اسمي فاطمة السيد الهُريجي، عندي 19 سنة، من محافظة دمياط، طالبة في الفرقة الأولى شريعة وقانون المنصورة، بكتب نصوص وخواطر وكتبت كام قصة قصيرة كدا، بقالي سنتين بكتب وداخلة في التالتة أهو الحمد لله، خدت كورسات أون لاين في الكتابة وعندي خبرة في التصحيح اللغوي الحمد لله.
هو مفيش معاناة تُذكر يعني بس الريتش لما بنزل حاجة وبيبقى واطي بيحبطني.
س٢/ من اول الداعمين اليك
وهل استمروا ف هذا الدعم الى الان؟
أهلي أول ناس دعموني وما زالوا مستمرين، وصحابي بس اللي دعمهم بيفرق معايا ضحى حجازي وإسراء صلاح ومريم طارق ربنا يباركلي فيهم كلهم يا رب.
س٢/ ما هو اول انجاز حققته!؟
وكيف كان شعورك!
شاركت في كتاب ورقي مع مجموعة كُتاب تبع كيان نصوص عظيمة، كنت مبسوطة جدًا طبعًا عشان حسيت إني بدأت أحقق حاجة.
س٤/تكلم عن بعض الكيانات/المبادرات التي قامت بمساعدتك للوصول الى هذا المكان!؟
كيان نصوص عظيمة ليه فضل كبير جدًا عليا بجد في التشجيع والدعم حقيقي، ومُبادرة حلم الشباب.
س٥/ هل وقفت ع مسرح قبل ذلك!؟
وما كان شعورك فى اول ظهور لك؟
لا، بس بتمنى دا يحصل وعندي أمل إني ممكن أحقق دا في يوم من الأيام.
س٦/ متى اكتشفت موهبتك
وما هى اول خطوة بعد اكتشافك لهذه الموهبة؟
من سنتين وأنا في تانية ثانوي، أول خطوة أخدتها بعد أول نص كتبته إني وريته لواحده صاحبتي ووقتها كان عجبها وقالتلي خدي الخطوة ونزليه، نزلته وكانت دي البداية.
س٧/ من هو قدوتك ف مجالك ولماذا!؟
الدكتورة حنان لاشين؛ لإنها حقيقي من أعظم الكُتاب وطريقتها في الكتابة والمرادفات اللي بتختارها في أعمالها -وخصوصًا سلسلة مملكة البلاغة- بتشدني جدًا واتعلمت منها كتير بجد.
س٨/ هل البيئة التي تعيش فيها كانت الداعم الكبير لك ام العائق امام الوصول لحلمك؟
مكانتش عائق ولا حاجة عادي
س٩/ ماذا تعلمت عندما بدأت فى هذا المجال؟
اتعلمت إني أصبر لحد ما أوصل لحلمي اللي بتمناه، وإنه مش صح إني أستعجل كل حاجة في وقت واحد وإني لازم آخد السلم من أوله.
س١٠/ ما هى اهدافك وماذا ترى نفسك بعد خمس اعوام من الان؟
هدفي إني أحقق إنجازات كتير جدًا في مجالي في الكتابة أو مجال دراستي في القانون وأوصل للي طول عمري بحلم أوصله، شايفة نفسي إني بإذن الله هبقى مصححة لغوية أو هقدم في النيابة بعد الكلية.
س١١/ ما هى اهم النصائح التي كانت الداعم الرئيس لك؟
ناس كتير حواليا دايمًا بينصحوني إني أكمل وأطور من نفسي مفضلش ثابتة في مكاني على حاجة واحدة بس، وإني أصبر عشان أنول مرادي.
وقبل انهاء هذا الحوار نريد ان توجه نصيحه للغير!؟
خليكوا متمسكين بحلمكوا أيًا كان متتخلوش عنه، واهتموا دايمًا إنكوا تطوروا من نفسكوا، ومتسمعوش لكلام أي حد يحبطكوا، خليكوا مكملين في طريقكوا وبإذن الله توصلوا.
ها الان الحوار قد انتهي بعدة نصائح واقوال تفيد الغير
بقلم الصحفية ومؤسسة الجريدة اسراء على ابراهيم
تعليقات
إرسال تعليق